लोकप्रिय गायक रामजी खाँण र शान्तिश्री परियारको सुमधुर स्वरमा नयाँ लोकदोहोरी गीत ‘लुकी लुकी’ सार्वजनिक (भिडियो सहित)

काठमाडौं । नेपाली लोकसङ्गीतको दुनियाँमा फेरि एकपटक जीवन्त अभिनय, रमाइलो लय, दमदार स्वर र शैलीको मिश्रण बोकेको नयाँ लोकदोहोरी गीत ‘लुकी लुकी’ सार्वजनिक भएको छ।

लोकप्रिय गायक रामजी खाँण र गायिका शान्तिश्री परियारको सशक्त स्वरले सजिएको यो गीतले छोटो समयमै दर्शक स्रोताको ध्यान तान्न सफल भएको छ।

विनया अधिकारी र कृष्ण लामिछानेको शब्द सिर्जनामा तयार पारिएको यस गीतमा परम्परागत लोकभावनासँगै आधुनिक युवापुस्ताको शैली मिसिएको छ। संगीत कृष्ण लामिछानेकै रहेको छ भने आकर्षक हुकलाइन विनया अधिकारीले लेखेका हुन्।

गीतको भिडियो पक्षलाई झनै आकर्षक बनाउन सुनिल क्षेत्री, प्रियंका कार्की, विनया अधिकारी, करिश्मा ढकाल, बिना राउत, करिश्मा शाही र लोसीना लमिछानेले अभिनय गरेका छन्। निर्देशन स्वयं सुनिल क्षेत्रीले गर्नुभएको छ। छायांकन, सम्पादन र रंग संयोजन पवन सुशलिङको रहेको छ।

गीतको बोल “तिमीलाई भेट्न ओइ माया बस्छु ढुकीढुकी, नहिँड न ओइ माया लुकी लुकी” बाट सुरू भएर मन लोभ्याउने चाल, रमाइला कटाक्ष र सामाजिक प्रेमप्रवृत्तिलाई झल्काउने संवादहरूमार्फत गीतले प्रेम र हास्यरस दुबैको समायोजन गरेको छ।

गीतमा प्रयोग गरिएका व्यङ्ग्य–प्रधान संवादहरूले गीतलाई थप मनोरञ्जनात्मक बनाएका छन् –
– “गालामा डाम बस्ला पाँच औँलाको!”
– “रावणले झैँ हरेर लाने हो?”
– “रावण हैन, बनिदेऊ राम जस्तो।”

यी संवादहरूले युवापुस्ताको प्रेमप्रतिको धारणा, व्यवहार र चाहनालाई चुलोचोकाबाट बजारसम्म झल्काउने लोकशैलीमा प्रस्तुत गरेका छन्।

सेट डिजाईनर जटाशंकर,र  कोरियोग्राफर  अभि वाग्ले, मेकअप कलाकारहरू अनिमेश गुरुङ, सुवास तिमल्सिना र सुजिता श्रेष्ठको योगदानले भिडियोको दृश्य पक्षलाई आकर्षक बनाएको छ।

गीतले हास्यरस र प्रेमरसको संगालोमार्फत नेपाली समाजमा विद्यमान लुकीछिपी प्रेम, प्रेममा घमण्ड, समर्पण र इमान्दार सम्बन्धको सन्देश दिन खोजेको देखिन्छ।

भिडियो हेर्नुहोस्: